पंढरपूर : कार्तिकी एकादशीनिमित्त पंढरपुरात विठूरायाचे दर्शन घेण्यासाठी वारकऱ्यांची गर्दी झाली आहे. राज्याचे महसूलमंत्री चंद्रकांत पाटील यांनी पहाटे सपत्नीक श्री विठ्ठल-रुक्मिणीची शासकीय महापूजा केली. त्यांच्यासह सुनील ओमासे आणि नंदा ओमासे या वारकरी दाम्पत्याला महापूजेचा मान मिळाला. ‘राज्यातील शेतकऱ्यांना आणि सामान्य जनतेला सुखी ठेव,’ असे साकडे चंद्रकांत पाटील यांनी विठूरायाला घातले.
महापूजेनंतर संत तुकाराम भवनात झालेल्या कार्यक्रमात मानाचे वारकरी असलेल्या ओमासे दाम्पत्याचा पाटील यांच्या हस्ते सत्कार करण्यात आला. हे शेतकरी दाम्पत्य सांगली जिल्ह्याच्या मिरज तालुक्यातील बेडग या गावातील आहे. २००३पासून वारी करणारे ओमासे यांना एक मुलगा आणि एक मुलगी आहे. विठ्ठल-रुक्मिणीची चांदीची मूर्ती, शाल आणि श्रीफळ देऊन या दाम्पत्याचा सत्कार करण्यात आला. प्रथेप्रमाणे त्यांना एसटीचा मोफत पासही देण्यात आला.